Lög félagsins

Heimili og varnarþing

Félagið heitir Félag sálgreina á Íslandi (Association of Psychoanalytic Psychotherapists / Psychoanalysts in Iceland). Lögheimili og varnarþing þess er í Reykjavík.

Markmið Félags sálgreina á Íslandi er að tryggja að almenningur á Íslandi geti treyst því að félagsmenn þess uppfylli viðhlítandi kröfur um menntun og faglega hæfni. Þá er félaginu ætlað að efla faglega meðferðarvinnu sálgreina og stuðla að umræðu um sálgreiningu í íslensku samfélagi.
Félagið er opið þeim sem hafa: a. Lokið viðurkenndu klínísku meðferðarnámi í sálgreiningu / sálkönnun og geta því kallað sig sálgreini / sálgreinanda / sálkönnuð. b. Samþykkt starfs- og siðareglur félagsins og aðhyllast markmið þess.
Almennur félagi í Félagi sálgreina á Íslandi er hver sá sem hefur staðist ofangreindar kröfur og hefur hlotið samþykki fagráðs félagsins. Heiðursfélagi getur sá orðið sem hefur að mati stjórnar og fagráðs félagsins aukið vegsemd sálgreiningar á Íslandi eða erlendis.
Til að sækja um aðild að Félagi sálgreina á Íslandi skal skila inn:
1. Útfylltu umsóknareyðublaði (sem fæst hjá félaginu).
2. Lífsferilskrá (Curriculum Vitae).
3. Gögnum sem staðfesta:
  1. Námslok.
  2. Klíníska meðferðarvinnu.
  3. Handleiðslu.
  4. Persónulega meðferð.
4. Umsóknargjaldi.

Félag sálgreina á Íslandi starfar í tengslum við yfirvöld heilbrigðis- og tryggingamála á Íslandi. Í fagráði Félags sálgreina á Íslandi sitja tveir kosnir fulltrúar úr stjórn félagsins og einn fulltrúi landlæknisembættis. Fulltrúi landlæknis skal hafa þekkingu á eðli sálgreiningarmeðferðar.
Fagráð tekur á faglegum álitamálum og fagráð annast í samstarfi við félagsmenn endurskoðun á starfs- og siðareglum félagsins.
Fulltrúi í fagráði sem ekki er sálgreinir skal ekki hafa hagsmuna að gæta sem skarast gætu á við hagsmuni félagsmanna í Félagi sálgreina á Íslandi.

Aðalfundur félagsins skal haldinn vor hvert.
Aðalfundur / félagsfundur telst löglega boðaður ef fundarboð er sent með tölvupósti eða bréfleiðis til félaga með a.m.k. tíu daga fyrirvara.
Allir skráðir félagar hafa rétt til setu og atkvæðisrétt á aðalfundi.
Á aðalfundi er samþykkt starfsáætlun til eins árs.
Á aðalfundi skal kosin þriggja manna stjórn auk endurskoðanda.
Dagskrá aðalfundar skal vera eftirfarandi:
1. Fundur settur.
2. Kosning fundarstjóra og fundarritara.
3. Skýrsla stjórnar fyrir liðið starfsár lögð fram til samþykktar.
4. Reikningar félagsins lagðir fram til samþykktar.
5. Kosning í stjórn.
6. Kosning endurskoðanda.
7. Ákvörðun félagsgjalda og umsóknargjalds.
8. Lagabreytingar.
9. Tillaga stjórnar um starfsáætlun lögð fram.
10. Önnur mál.
11. Fundarslit.
Félagsfundur er atkvæðisbær ef a.m.k. 3/5 félagsmanna eru mættir.

Í stjórn sitja formaður, ritari og gjaldkeri sem kosnir eru á aðalfundi.
Stjórn skal funda að minnsta kosti 4 sinnum á ári eða oftar ef þurfa þykir.
Stjórn félagsins er heimilt að skipa hópa til starfa í nafni félagsins.
Stjórn hefur umboð til að álykta í nafni félagsins enda sé ályktunin í samræmi við grundvallarmarkmið þess.

Reikningsár félagsins er almanaksárið.
Á aðalfundi skulu lagðir fram reikningar undirritaðir af stjórn og endurskoðanda.

Tillögur um lagabreytingar skal leggja fram til stjórnar a.m.k. fimm dögum fyrir aðalfund.
Lögum þessum má aðeins breyta á aðalfundi félagsins.
Lagabreytingar teljast samþykktar ef 3/5 hluti félaga sem sækja aðalfund samþykkja breytingarnar.

Félagi sálgreina á Íslandi má slíta með ákvörðun 3/5 skuldlausra félaga á aðalfundi eða á félagsfundi.
Náist ekki tilskilinn félagafjöldi á aðalfundi / félagsfundi má halda framhaldsfund og þarf þá samþykki 3/5 fundarmanna til að félagið verði leyst upp.
Við slit félagsins skulu eignir, ef einhverjar eru, renna til geðræktar.